عمل شبكة محلية بالصور



السلام عليكم ورحمة الله وبركاته

درس اليوم درس جميل جدا وبصراحة كتير جدا بيسأل عليه وعشان كده انا هحاول افصل فيه

كيفية عمل شبكة محلية (lan) والجماعة بتوع الفرنجة بيسموها local area network

والموضوع هيكون علي شكل اسئلة لانه بيكون اسهل

اولا ما هي الشبكة المحلية :



بالبلدي كده لو انت معاك اتنين تلاتة اصحابك سواء في نفس البيت او في بيوت تانية

وعاوز تعمل شبكة نت بينك وبينهم هيا دي الشبكة المحلية وسيبك من الرغي الكتير وافهمها كده

ولم احتاج الي انشاء شبكة محلية :

هقولك يا عم

تخيل كده لو انت مشترك في نت وبتدفع لوحدك وعاوز تخلي حد يشيل معاك الليلة طبعا هتحتاج الشبكة المحلية

ولو محتاج انك تعمل مشاركة الملفات يعني ترسل وتستقبل ملفات من والي جهازك واجهزتهم يبقي هتعمل شبكة محلية

وتخيل لو انت وعمك وابن عمك واتنين تلاتة اصحابك بتستخدموا طابعة واحدة بس مش يبقي احسن لو محتاج كده يبقي هتعمل شبكة محلية

ما مدي قدرة الشبكة علي تحمل عدد المشتركين

شوف يا عم من حيث عدد المشتركين مفيش اي خوف يعني ده علي حسب سرعتك مش سرعتك انت لأ سرعة النت

يعني علي راي المثل " علي أد لحافك مد رجليك" او " علي أد سرعتك زود المشتركين"

يعني انت وشطارتك زود السرعة وزود المشتركين ومش هتخسر ان شاء الله

ما هي المسافة بيني وبين كل مشترك

شوف بقي واحدة واحدة وهوضحلك في الشرح

وهنا السؤال

كيفية انشاء الشبكة المحلية بأفضل الاحوال وبأقل التكاليف

هناخدها واحدة واحدة كده وبراحتنا خالص ويا ريت تقوم تعمل فنجان قهوة او كباية شاي بند خمسين عشان تركز

الاجهزة المطلوبة :

راوتر __ HUP او سويتش __اسلاك انترنت __ اراجة __splitter__

RJ45 ( سبلتر) او فلتر __ اكتر من جهاز ( طب ما هو طبعا )

هناخد كل جهاز واحدة واحدة كده ووظيفة كل جهاز

الراوتر : الراوتر ده هو اللي بيستقبل الاشارة الاتية من السلك الرئيسي ( الكبس بتاع التليفون ) يعني لازم الاشارة تعدي عليه الاول

وطبعا فيه منه انواع كتير ونصيحة من اخوك احسن نوع وبسعر معقول D-LINK وطبعا فيه نوع واحد بورت واتنين بورت وتلاتة

براحتك علينا يا باشمهندس ايه هو البورت ده:

ماشي يا عم انا هقول لك البورت ده هو المنفذ اللي بيطلع منه اسلاك لبقية الاجهزة

يبقي كده الراوتر هيدخل له سلك وهيخرج منه اسلاك حسب عدد البورتات ( المنافذ) اللي خارجة من الراوتر

يعني ايه المطلوب مني يا باشمهندس :

شوف يا حاج اشتري راوتر D LINK واحد بورت بس خد بالك

استني استني واحد بورت ايه وانا عندي مشتركين كتير وبعدين اخد بالي من ايه هو من اولها هتخوفني

اشتري بس واحد بورت وانا هقول لك تعمل ايه وانا مش عاوز اخوفك ولا حاجة بس عاوز انبهك علي نقطة مهمة

خد بالك الراوترات فيه كتير منها مضروب والدي لينك بردو نزل منه مضروب يعني لازم يكون اصلي

وانا هعرف منين انه اصلي


شوف يا عم لازم تكون واثق من المكان ومن السعر وانا ممكن اخدمك في حاجة زي دي

اه هو ده اللي كنت خايف منه انت عاوز تعمل لنفسك شغل :

لا تخاف ولا حاجة مصر مليانة محلات جميلة جدا وفيها راوترات اصلي تقدر تشتري منها ولو عاوز مساعدة كلمني بس

وانا هقولك من غير مقابل خالص

وده شكل الراوتر



















خلاص خلصنا من الراوتر خد لك شوية شاي كده وروق



السويتش او HUP :


مشهور في مصر باسم السويتش والمطلوب منك سويتش فيه بورتات كتير علي عدد المشتركين وده امره سهل وانواعه كتيرة

ورخيصة

ايوة السلك ده هيدخل عالسويتش وبعد كده هناخد من السويتش وصلات للمشتركين

ودي صورة السويتش







والحاجات التانية ما وظيفتها

ناخد نظرة عامة كده عالموضوع : كبس تليفون طالع منه سلك والسلك داخل علي راوتر والراوتر طالع منه سلك داخل علي سويتش

والسويتش طالع منه اسلاك موزعة للمشتركين بس كده

بس لازم السلك يكون فيه حاجة تدخل في السويتش ودي بنسميها RJ وبنركبه في السلك بــ ( الاراجة) وبعد التركيب ده شكلها










والتركيب بيكون بطريقة معينة ممكن وانت بتشتري السلك تقول للبياع يأرجهولك وتريح دماغك

او ممكن تأرجه بنفسك وهقول لك ازاي

السلك فيه 8 اسلاك صغيرة ( بني , اخضر , ازرق , برتقالي , ابيض بني , ازرق ابيض , اخضر ابيض , برتقالي ابيض)

وبتتركب بترتيب معين علي التوالي ( بني , ابيض بني , اخضر , ازرق ابيض , ازرق , اخضر ابيض , برتقالي , برتقالي ابيض )

وبتتركب طبعا بالاراجة زي ما قلنا وكل السلوك بتكون بالترتيب ده تبع مايكروسوفت ما قررت

بتضع السلوك بالترتيب ده في الارجي (لها مكان طبعا)  وبعدين بتضغط عليها بواسطة الاراجة حتي تتثبت في الارجي

وده شكل الاراجة












وفائدة السبلتر ايه


فائدة السبلتر انك عشان تشغل التليفون بتدخل الخط الرئيسي علي اسبلتر الاول وبعد كده بيطلع

من الاسبلتر سلكين

سلك للتليفون وسلك للراوتر والاسبلتر صغير وانواعه كتير بس كل ما كان النوع انضف كل ما كان احسن

لأن الاسبلتر بينقي الخط يمعني انه بيصفي الاشارة للتليفون وللنت

ودي صورة اسبلتر








وبكده يبقي تمام


فاضل انك توصل سلوك من السويتش لجهازك ولاجهزة المشتركين وفاضل نقطة صغيرة وهي


تهيئة جهازك واجهزة المشتركين


وهي سهلة جدا


طبعا جهازك له IP هتخلي كل واحد من المشتركين يعمل IP لنفسه بس يغير في اخر رقم ويحط نفس القيم اللي عندك

عدا الـIP


يعني لو عندك في جهازك IP


192.168.1.2 اللي بعدك يعمل اي بي 192.168.1.3 وهكذا والقيم الاخري يضعها زيك بالظبط



وبعدين كل واحد يعمل الخطوة دي علي جهازه :


كليك يمين علي My Computer

properties


computer name



change




بجانب خانة اسم الكمبيوتر هسمي الكمبيوتر اسم


وبجانب خانة workgroup هسمي المجموعة اسم وليكن ISGROUP




Comments

  1. وينور عليك ياباشمهندس

    ReplyDelete
  2. Anonymous2/08/2009

    طيب لو انا عندي سويتش 4 بورت وعايز ادخل معايا ناس تاني وازود السرعه واجيب سويتش
    انا سامع ان اللي بياخد من الراوتر بيبقى اسرع من السويتش
    راي حضرتك ايه
    اجيب سويتش اكبر وكلنا ناخد منه ولا الموضوع عادي
    مستني ردك
    مشكور مقدما

    ReplyDelete
  3. Anonymous2/08/2009

    اسف راوتر اربعه بورت

    ReplyDelete
  4. اسف علي التأخير لظروف نتيجة الامتحان وانت عارف

    الواحد بيبقي مرعوب ازاي مبيعرفش حتي ياكل

    اما بالنسبة لسؤالك

    شوف تاخد من الرواتر زي ما تاخد من السويتش مش فارقة

    بس المهم يكون نوع السويتش نضيف

    وبعد كده جودة النت معتمدة علي المسافة وعلي السلك

    وعلي اعتبارات تانية ومش هتفرق كتير

    شكرا علي مرورك

    دمت بود,

    ReplyDelete
  5. Anonymous2/12/2009

    نسيت تقول لنا حاجة ياهندسة بعد الشرح الجميل ده
    كيف أجعل كل مشترك يدخل على الشبكة من خلال باسوورد
    وكيف أجعل كل مشترك له نصيب معين من سرعة الداونلود لأن فيه ناس مفيش عندهم رحمة وبيتغلوا الشبكة في تنزيل أفلام وخلافه وبيسحبوا السرعة بطريقة مملة
    أرجو أن ترد أو إرسل الإجابة على a_asem@hotmail.com
    أنا مهندس عاصم وعندي شبكة زي اللي حكيت عنها بالضبط ومحتاج المعلومات دي ضروري
    أشكرك

    ReplyDelete
  6. عنيا يا باشمهندس هرسلك الاجابة علي سؤالك
    وشكرا علي مرورك

    دمت بود,

    ReplyDelete
  7. Anonymous5/29/2009

    يا سلام
    و الله العظيم كلمة شكر قليلة عليك يا زعيم
    الله يعطيك العافية
    و يا ريت نصير أصحاب و ده ايميلي علشان نتواصل مع بعضينا
    fawzyrock@hotmail.com
    و يا ريت مكونش تقلت عليك

    ReplyDelete
  8. تشكرني علي ايه بس يا عم فوزي

    واحنا طبعا اصحاب

    دمت بخير,

    ReplyDelete
  9. Anonymous7/30/2009

    أشكر جدا .. شرح رائع ومميز ربنا ينورك ويسعدك دنيا وآخرة
    أنا درست الشبكات بس شرحك نورني وفهمت حاجات ماكنتش فهماها
    مشكور ياعبقري

    ReplyDelete
  10. ياااه عبقري مرة واحدة كده ده تواضع منك

    ماشي يا ستي شكرا علي مرورك الرائع

    دمتي بود,

    ReplyDelete
  11. Anonymous9/19/2009

    انا داخل على شبكة وفيها ناس كتير وعاوز انقل حاجة من جهاز واحد اخر ومعموله باسورد هل فى برنامج اقدر اعرف بيه الباس ورد ممكن ترد علية وده اميلى, ahmedamen20062000@yahoo.com

    ReplyDelete
  12. Anonymous9/19/2009

    انا داخل على شبكة وفيها ناس كتير وعاوز انقل حاجة من جهاز واحد اخر ومعموله باسورد هل فى برنامج اقدر اعرف بيه الباس ورد ممكن ترد علية وده اميلى, ahmedamen20062000@yahoo.com ممكن تردو علية ضرورى اخوكم فى الله احمد

    ReplyDelete
  13. بص يا عم احمد مفيش طريقة خالص الا الاختراق

    وسيبك من اللي يقوللك دوس ولا غيره

    عشان تتعلم الاختراق انا بفضل c++

    وبعدين اصلا غلط انك تدخل جهاز واحد من غير اذنه

    ReplyDelete
  14. Anonymous11/05/2009

    ممكن اميلك يا صاحبى عايز استفيد منك حاجات انا اميلى ياريت تضيفبى عندك
    love_aliloz@yahoo.com

    ReplyDelete
  15. اوك

    ان شاء الله هضيفك

    ReplyDelete
  16. Anonymous2/28/2010

    شكرا يا معلم الكل وعايز نبقى اصحاب واى جديد نرجو
    منك المتابعه ولو فى رقم تليفون ابتعلى على الميل
    mrbrakat@yahoo.com

    ReplyDelete
  17. نورتنا هنا و الله

    شكرا ليك

    ReplyDelete
  18. Anonymous8/18/2010

    بعد اذن حضرتك انا عندى ف الشركة مجموعة اجهزة كلها متوصله بالنت ولكن وايرلس وعايز اعمل شبكة اربط بيها الاجهزة ببعضها واعرف عليها البرنتر ياريت لو حضرتك تقدر تساعدنى بالشرح ال اقدر من خلاله انفذ دا وياريت لو اقدر اعمل لكل جهاز باسورد
    دا اميلى بعد اذنك mido_sonny1@yahoo.com
    اخوك م احمد قطر

    ReplyDelete
  19. انتا كده عايز تعمل LAN لان الـWAN متركبة

    بمعني ان الاجهزة متوصلة بالنت انتا بس محتاج تربطهم ببعضهم بالبلدي

    انتا بس محتاج سويتش هتأرج تأريج عادي خالص زي اللي انا شارحه فوق

    هتوصل كل الاجهزة بالسويتش ومعاهم الطبعة وكده

    الحكاية بقت فل

    اما لو تقصد انك عايز تربط الاجهزة ببعضها وايرلس

    فده موضوع تاني مش هيختلف كتير

    يعني بدل الواير هيبقي وايرلس ^_^

    ReplyDelete
  20. Anonymous11/16/2010

    جميل جدا الي الامام ,

    ReplyDelete
  21. ياسلام على شرحك الروعه
    ماشاء الله عليك يابشمهندس بجد شرح ممتاز
    ربنا يكرمك
    انا حاشتغل الفترة اللي جاية في الشبكات وخبرتي فيها مش اوي
    ياريت تقدر تساعدني
    ده اايميلي ..
    ms.smoora@yahoo.com

    ReplyDelete
  22. Anonymous1/05/2011

    الله ينور عليك يا بشمهندس بس عاوز اقولك حاجة ليه شرحك بالهجه المصرية بس و انا كتير كلامك مش فاهم معناه و ياريت تتكلم بالهجه الصعيديه و سلامي عليكي يا شبكات وو مخلله يا شبكات

    ReplyDelete
  23. ياه بجد روعه ياهندسه والله استفدت جدا
    انا موصل لمجموعة ناس بس عاوزك توضحلى من فضلك موضوع الباسورد لكل عضو وحكاية انى اعمل لكل واحد سرعة تحميل محدده ارجو الاهتمام من حضرتك
    وبالنسبه لبرنامج النت كت ده لو حد استخدمه ازى اعالج الموضوع ده ده ميلى ارجو الافاده اخوك احمد
    midicinelord@yahoo.com

    ReplyDelete
  24. eng:mohamed adly3/31/2011

    انا اقولك موضوع ازاي تخلي لكل واحد باص ورد ده ببيبقي محتاج كيسة تبقي سيرفر وبتسطب عليها حاجة اسمها الميكروتك وده نوع من انواع السيرفرات بيديك تحكم كامل للناس اللي معاك علي الشبكة زي انه يدخل بيوز وباص خاص بيه مربوط بمكا الجهاز بتاعة وتعرف هو حمل اد ايه وتحددله سرعتة وحاجات تاني كتير جميلة جدا انا شغال بيه في ادارة شبكة وير لس وينفع يتعمل للشبكة العادية اللي بالسلك وشكرا

    ReplyDelete
  25. الله ينور عليك بجد شرح تحفه والجميل انو بلدى
    بس انا عندى مشكله صغيره انا عندى شبكه وتمام التمام شبكه محليه بس عايز اعمل لكل مشترك باسورد او باسورد عام لكل المشتركين والحقيقه مش عارف ازاى شوفت واحد عاملها تيجى تفتح النت تلاقى صفحه فى موسيقى كده وطبعاً كاتب اللى هو عايزه وبعدين تكتب الباسورد واليوزر وتدخل والحقيقه هو مش عامل كيسه سيرفر ولا حاجه هو جايب برنامج بس مش عارف اوصله

    ReplyDelete
  26. نسيت تقول لنا حاجة ياهندسة بعد الشرح الجميل ده
    كيف أجعل كل مشترك يدخل على الشبكة من خلال باسوورد
    وكيف أجعل كل مشترك له نصيب معين من سرعة الداونلود لأن فيه ناس مفيش عندهم رحمة وبيتغلوا الشبكة في تنزيل أفلام وخلافه وبيسحبوا السرعة بطريقة مملة
    أرجو أن ترد أو إرسل الإجابة على nor_add2001@yahoo.com
    هى رسالة مقتبسة لكن مهمة بالنسبة لى وأرجو الرد ولاأجد كلمة تعبر الا جزاك الله خيراً

    ReplyDelete
  27. Anonymous3/12/2012

    بارك الله فيك يا خونا أخوك ليبي حر و أن شاء الله تكون في ميزان حسناتك ولو حاب نتعرف و نستفيدد من بعض ضيفني علي الياهو osama_layas2007@yahoo.com

    ReplyDelete
  28. موضوع شامل و مفصل مما دفعني لخطوه مشابهه
    أساسيات الشبكات المحلية

    ReplyDelete
  29. اعتذر عن التأخير يا شباب , انا الحمد لله خلصت الكلية وفي الجيش دلوقتي
    أنا بشكر الناس الجميلة دي اللي علقت عالموضوع
    معظام الاسئلة في ازاي اعمل باسوورد لكل مشترك وتوزيع السرعة والكلام ده
    الحل في سيرفرات زي سيرفر المايكروتك مثلا وده له شرح لوحده
    اما الأخ اللي بيقول من غير سيرفر فده باستخدام برنامج زي برنامج ايزي كافي مثلا ,بس ده بيبقي متكون من جزئين جزء بيتسطب عندك وجزء عند المشترك .وطبعاً ده بيكون في مراكز الانترنت وكده .

    ReplyDelete
  30. Anonymous7/31/2016

    2016 ووجدت الموضوع مفيد ياريت تحديث حسب البرامج الجديدة

    ReplyDelete

Post a Comment